«Усе хлопцы працуюць на энтузіязме і з цікавасці да праекту»
1- 22.03.2025, 11:57
- 1,402
Беларускія студэнты прыдумалі гульню пра сярэднявечны Тураў.
Калі Давід вучыўся ў 11-м класе, ён надумаў распрацаваць кампутарную гульню, сюжэт якой разгортваўся б у Беларусі. Да хлопца далучыліся яшчэ некалькі распрацоўнікаў – і вось ужо тры гады каманда працуе над гульнёй пра сярэднявечны Тураў.
CityDog.io пагутарыў з хлопцамі і даведаўся, як можна стварыць гульню з мінімальным бюджэтам.
Яшчэ ў школе Давід пайшоў на курсы стварэння гульняў, у рамках якіх трэба было рэалізаваць невялікі праект. Так хлопцу прыйшла ідэя стварэння Tales of Meadows, сюжэт якой разгортваецца ў сярэднявечным Тураве.
– Мне хацелася зрабіць гульню пра Сярэднявечча, паколькі на самім курсе ў нас было шмат мадэлек і матэрыялаў, якія дазваляюць распрацаваць праект менавіта ў гэтым сетынгу. Я падумаў, што гульняў, дзе сюжэт праходзіў бы на тэрыторыі нашай краіны, яшчэ не было. Мне і самому было цікава ўбачыць такі праект і пагуляць у яго. Амаль адразу да мяне далучыліся сябры, Улад, Багдан і Слава, і мы сталі працаваць учатырох, – расказвае хлопец.
«Усе хлопцы працуюць на энтузіязме і з цікавасці да праекту»
Пазней да Давіда сталі далучацца і іншыя распрацоўнікі – пра гульню яны даведваліся з сацсетак.
– Цяпер каманда складаецца з 20 чалавек – усе хлопцы працуюць на энтузіязме і з цікавасці да праекту. Я сам вучуся на другім курсе БНТУ, мая спецыяльнасць увогуле не звязаная з праграмаваннем, а гульнёй займаюся ў вольны час.
Да паўнавартаснай распрацоўкі мы прыступілі летам 2024 года. З часткай каманды з'ездзілі ў Тураў – хадзілі ў музей, глядзелі наваколле, вывучалі мапы. Яшчэ ў нас ёсць хлопцы, якія дапамагаюць з гістарычнымі даведкамі: расказваюць пра побыт жыхароў, якая тады была архітэктура.
Але важна разумець, што дамагчыся стаадсоткавай аўтэнтычнасці проста немагчыма. Па-першае, інфармацыі пра Тураў 13-га стагоддзя не так ужо шмат, па-другое – часам трэба рабіць выбар на карысць умоваў гульні, каб карыстальніку было прасцей і зручней.
У гульні будзе беларуская, расейская і ангельская агучкі. Ангельская агучка ў нас ужо запісаная, мы працавалі з ёй самастойна. А з беларускай мовай нам падахвоцілася дапамагчы каманда Kambeg – хлопцы на энтузіязме агучваюць фільмы і гульні.
«Прыступаць да распрацоўкі гульні можна ў адзіночку і без грошай»
Гульня Tales of Meadows будзе ў жанры прыгодніцкага экшэну.
– У нас плануецца цалкам безінтэрфэйсавае праходжанне, – кажа Давід. – Гэта значыць, гульцу трэба будзе праходзіць узроўні без якіх-небудзь мапаў, пазнак або падказак, арыентуючыся толькі на наратыўны дызайн – падказкі ўнутры свету.
Найбліжэйшым рэферэнсам да нашай гульні можна назваць God of War 2018 года. Толькі гэта хутчэй пра гейм-дызайн і структуру. Параўноўваць маштабы нашай гульні і God of War, на якую былі выдаткаваныя мільёны даляраў, не зусім правільна.
У нас ёсць платная падпіска на Boostie, адтуль нам ідзе невялікая падтрымка ад людзей. Гэтыя грошы мы аддаем на арганізацыйныя моманты. Але ў цэлым прыступаць да распрацоўкі гульні можна ў адзіночку і без грошай – усё залежыць ад амбіцый і таго, які праект ты хочаш бачыць. Ёсць шмат бясплатных мадэлек і рухавічкоў, якімі можна карыстацца. Самае галоўнае – цікавая задумка, каб людзі маглі потым да цябе далучыцца.
«Самым складаным было не выгараць»
У канцы лютага распрацоўнікі стварылі для Tales of Meadows старонку ў Steam, каб больш людзей даведваліся пра гульню. Улад, які ўдзельнічаў у распрацоўцы амаль з самага старту, расказаў CityDog.io, калі запланаваны рэліз.
– Сёлета хочам выпусціць бясплатную 20-хвілінную дэмаверсію, а канчатковы рэліз плануем на 2026 год. Праходжанне зойме блізу чатырох гадзінаў – гэта даволі невялікая гульня. Пакуль думаем над коштам. Мусіць, ён будзе блізу 10$. Мне здаецца, попыт будзе – мы ўжо збіраем віш-лісты. Галоўнае – зрабіць добры прадукт, тады ён будзе прадавацца.
У нас няма ўстаноўкі на мэтавую аўдыторыю з пэўнай краіны – хочам выйсці і на замежных хлопцаў. Думаю, у першую чаргу іх зачэпіць сюжэт і гейм-дызайн.
Пры распрацоўцы самым складаным было не выгараць і давесці праект да рэлізу, што мы пакуль яшчэ не зрабілі. Але кідаць мы не плануем.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
