Украінскія байцы патрапілі ў палон, але неўзабаве выйшлі з яго, захапіўшы палонных
3- 27.04.2025, 15:17
- 9,888
Дзіўная гісторыя можа скласці канкурэнцыю самаму неймавернаму кінасюжэту.
Падчас выканання баявога задання на тэрыторыі РФ два ўкраінскія дэсантнікі патрапілі ў палон да расейцаў. Расейскія штурмавікі атрымалі ад камандавання загад забіць палонных украінцаў, тыя ж надумалі даставіць украінскіх воінаў на расейскія пазіцыі - і ледзь не паплаціліся за гэта жыццём.
Нарэшце ўкраінцы ўгаварылі расейскіх салдат здацца ў палон самім, каб пазбегнуць «зачысткі» з боку сваіх жа - што, нарэшце, дапамагло выжыць усім удзельнікам гэтай дзіўнай гісторыі. Падрабязнасці рэальнай падзеі, якая можа скласці канкурэнцыю самаму неймавернаму кінасюжэту, расказаў журналіст Юрый Бутусаў.
Адбылася гэтая гісторыя некаторы час таму на адным з адцінкаў фронту на тэрыторыі РФ. Два ўкраінскія дэсантнікі падчас масаванага варожага штурму патрапілі ў палон да двух расейскіх штурмавікоў: тыя змаглі незаўважанымі падысці да пазіцый, якія трымалі ўкраінцы, пад прыкрыццём шчыльнага абстрэлу. А вось выйсці расейцам разам з палоннымі ўкраінцамі адразу не ўдалося.
«У маленькай хованцы яны селі ўчатырох, і правялі разам некалькі дзён. Вакол увесь час дроны, артылерыя і мінамёты наносяць удары. Расейцы данеслі камандаванню, што ўзялі ўкраінцаў у палон, і атрымалі загад - забіць палонных і прасоўвацца наперад. Але як толькі яны выйшлі і пачалі рухацца да расейцаў, то расейская артылерыя пачала па іх шчыльны абстрэл, бо адыходзіць расейцам падчас штурмавых дзеянняў забаронена», - распавёў Бутусаў.
Пасля няўдалай спробы вярнуцца да сваіх расейцы разам з бяззбройнымі палоннымі ўкраінцамі вярнуліся ва ўкрыцце, з якога выйшлі.
«Расейскія камандзіры патрабавалі наступаць, але гэта было немагчыма, бо нашыя дроны і артылерыя працавалі эфектыўна, і вельмі хутка ўвесь расейскі штурмавы атрад быў ліквідаваны, акрамя гэтых дваіх, якія сядзелі з нашымі. І тады палонныя ўкраінцы прапанавалі расейскім штурмавікам здацца ў палон, бо ўкраінскія камандзіры не будуць расстраляныя. Расейцы пагадзіліся - іх таварышы, з якімі яны ішлі на штурм, на сувязь ужо выйсці не маглі. Здарылася так, што шанец выжыць ім маглі даць толькі палонныя ўкраінцы», - адзначыў журналіст.
Са слоў Бутусава, наважыўшыся прыняць прапанову ўкраінскіх дэсантнікаў, расейцы вярнулі ім зброю і радыёстанцыі. Украінцы выйшлі на сувязь з украінскім камандаваннем і, дачакаўшыся выпадку, вывелі расейскіх штурмавікоў да тылавой пазіцыі.
«Паколькі расейскія штурмавікі паводзілі сябе сумленна, не забілі нашых байцоў, і паколькі яны нічога не парушалі паводле ўкраінскіх законаў, здаліся на тэрыторыі РФ, і падалі каштоўную інфармацыю, то да расейцаў нашы паставіліся з павагай. Іх нават не звязвалі. Я іх бачыў. Цяпер спакойна ў свой час пойдуць на абмен».
Журналіст дадаў, што мае відэа з палоннымі і ведае больш падрабязнасцяў дзіўнай гісторыі, аднак уважае за недарэчнае абнародаваць іх без згоды палонных расейцаў.
«Спадзяюся, што такая магчымасць усё ж адбудзецца. А два ўкраінскія героі-дэсантнікі, якія так нечакана ўзялі двух расейскіх палонных, вярнуліся на сваю пазіцыю і працягнулі выкананне баявой задачы», - рэзюмаваў Бутусаў.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
