«Ёсць два сцэнары развіцця вайны ва Украіне»

Вайсковы эксперт ацаніў іх імавернасць і наступствы.

Ёсць два сцэнары далейшага развіцця вайны ва Украіне. Першы - замірэнне, падчас якога краіна-агрэсарка Расея толькі набярэцца сіл, кампенсуе страты, адновіць сваю баяздольнасць і праз год зможа пачаць баявыя дзеянні шырэйшага маштабу; другі - замірэння не будзе, а РФ і далей будзе губляць свой асабовы склад, тэхніку і рэсурсы ў такім жа тэмпе, як цяпер, і да канца года яе чакае калапс.

Такое меркаванне выказаў вайскова-палітычны аглядальнік групы "Інфармацыйнае супраціўленне" Аляксандр Каваленка ў інтэрв'ю «Главреду».

«Ёсць два сцэнары. Калі будзе замірэнне, у Расеі будзе магчымасць перадыхнуць, кампенсаваць страты, аднавіць баяздольнасць. І ўжо праз год яна зможа пачаць баявыя дзеянні шырэйшага маштабу і іншага ўзроўню кровапраліцця не толькі супраць Украіны, але і супраць Еўропы. І гэта не проста запалохванне - гэта дастаткова рацыянальныя, лагічныя разлікі з улікам таго патэнцыялу, які застаўся ў Расеі ад Савецкага Саюза, а таксама таго, што яна можа зрабіць за год: што можа аднавіць, колькі назапасіць людзей, колькі боепрыпасаў, колькі тэхнікі аднавіць і г.д.», - адзначыў ён.

З іншага боку, калі Расея будзе ў такім жа тэмпе губляць асабовы склад, тэхніку, рэсурсы, як губляе зараз (а сёння ў РФ проста крытычны дэфіцыт тэхнікі), і замірэння не будзе, то да канца гэтага года яе чакае калапс, мяркуе Каваленка.

«Уласнымі сіламі Расея не зможа ўвогуле кампенсаваць страты тэхнікі ў зоне баявых дзеянняў. Толькі чалавечым рэсурсам кампенсаваць гэта немагчыма. Цяпер Расея спрабуе гэта рабіць, бо мае перавагу ў людзях, але і гэты рэсурс заканчваецца - жаўнеры з Паўночнай Карэі з'яўляюцца яскравым довадам», - сказаў эксперт.

Ён адзначыў, што пры ўмове першага сцэнару нават ёсць рызыка, што вайна перарасце ў трэцюю сусветную.

«Таму магчымыя два сцэнары: альбо Расея ідзе на перазагрузку, і праз год нас чакае яшчэ большае кровапраліцце, аж да ўзроўню трэцяй сусветнай вайны, альбо Расея высільваецца, і ў канцы 2025 года пачнуцца такія змены, якія вернуць магчымасці Сіл абароны Украіны на ўзровень перыяду вясны-лета 2022 года», – сказаў Каваленка.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]