Навукоўцы: Доўгі працоўны дзень мяняе структуру мозгу

Змены адбываюцца ў абласцях мозгу, якія адказваюць за прыняцце пастановаў і рэгуляцыю эмоцый.

Доўгі працоўны дзень ўздзейнічае на структуру мозгу, асабліва абласцей, звязаных з эмацыйнай рэгуляцыяй і выканальнымі функцыямі, такімі як працоўная памяць і развязанне праблемаў. Навукоўцы папярэджваюць, што сталае ператамленне выклікае адаптацыйныя змены ў нервовых тканінах, здольныя адбіцца на разумовых здольнасцях і эмацыйным стане чалавека, піша Medical Xpress.

Вядома, што доўгая перапрацоўка павялічвае рызыку сардэчна-судзінных хваробаў, парушэнні абмену рэчываў і пагаршэнні псіхічнага стану. Паводле звестак адмыслоўцаў Міжнароднай арганізацыі працы, штогод залішняя нагрузка становіцца чыннікам смерці больш як 800000 чалавек. Навукоўцы акцэнтуюць увагу на тым, што, нягледзячы на добрае разуменне паводніцкіх і псіхалагічных аспектаў ператамлення, фізіялагічная аснова і нейрапластычныя змены, выкліканыя стамляльнасцю, застаюцца нявывучанымі.

Для паглыбленага разумення праблемы спецыялісты выканалі структурны аналіз аб'ёмаў галаўнога мозгу, каб выявіць, якім чынам інтэнсіўная працоўная нагрузка ўплывае на розныя рэгіёны мозгу 110 медработнікаў, якія рэгулярна працуюць звышурочна (52 і больш гадзінаў у тыдзень). Ацэнка розніцы ў аб'ёмах аддзелаў мозгу праводзілася метадамі нейравізуалізацыі: ваксельная морфаметрыя (VBM), якая дазваляе выяўляць і параўноўваць варыяцыі узроўняў шэрага рэчыва ў розных адрэзках мозгу, а таксама атлас-аналіз, які выкарыстоўвае загадзя зададзеныя шаблоны для ідэнтыфікацыі і абазначэння канкрэтных структураў, напрыклад на здымках МРТ.

Атрыманыя звесткі выявілі прыкметныя змены ў структурах мозгу, якія адказваюць за выкананне выканаўчых функцый і рэгуляванне эмоцый, у асобаў, занятых больш за 52 гадзіны на тыдзень, у параўнанні з удзельнікамі, якія прытрымліваюцца стандартнага рэжыму працы. Напрыклад, атлас-аналіз выявіў павелічэнне аб'ёму сярэдняй лобнай звіліны амаль на 20 адсоткаў у тых, хто праводзіў шмат часу на працы. Сярэдняя лобная звіліна мае вялікае значэнне для цэлага шэрагу кагнітыўных працэсаў, няхай гэта будзе канцэнтрацыя ўвагі, працоўная памяць і моўная апрацоўка.

Метад VBM выявіў найбольш моцнае змяненне ў 17 абласцях мозгу, сярод якіх сярэдняя і верхняя лобныя звіліны, задзейнічаныя ў працэсах канцэнтрацыі ўвагі, стратэгічнага планавання і прыняцці пастановаў, а таксама астраўковая доля. Апошняя выступае ключавым звяном, што інтэгруе сігналы ад органаў пачуццяў, рухаў і ўнутраных сістэмаў арганізма. Яе функцыі ўключаюць эмацыйную апрацоўку, самаўсведамленне і разуменне сацыяльна значных кантэкстаў.

«Хоць атрыманыя вынікі патрабуюць асцярожнай трактоўкі, беручы да ўвагі пілотны характар даследавання, яны азначаюць важны пачатковы этап у вывучэнні сувязі паміж ператамленнем і станам мозгу», – заключаюць аўтары працы.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]